6 лютага 2008 г. у нацыянальным выставачным цэнтры «Белэкспа» адбылося адкрыццё XV Мінскай міжнароднай кніжнай выставы-кірмаша «Кнігі Беларусі — 2008». У дзень адкрыцця выставу, у якой традыцыйна ўдзельнічае і каталіцкае выдавецтва «Pro Christo», наведалі арцыбіскуп Мітрапаліт Мінска-Магілёўскі Тадэвуш Кандрусевіч і дапаможны біскуп Антоні Дзям’янка.

Свята кнігі ў Мінску будзе працягвацца да 10 лютага. У выставе-кірмашы бяруць удзел выдавецтвы з 20 краінаў свету. Упершыню прадстаўлены выдавецтвы з Таджыкістана, Казахстана, Венесуэлы і Швейцарыі. Ганаровым госцем сёлетняй выставы з’яўляецца Ізраэль.

Шчыра запрашаем наведаць экспазіцыю каталіцкага выдавецтва «Pro Christo» (месца 9в). У суботу 9 лютага а 12-й гадзіне пры стэндзе выдавецтва адбудзецца прэзентацыя малітоўніка «Вечны адпачынак дай ім, Пане», якую адкрые складальнік малітоўніка а. Артур Папроцкі CSMA. Уваход на кірмаш вольны. Выстава працуе кожны дзень з 10.00 да 19.00, а ў нядзелю — да 15.30.