Цікавым і нечаканым мерапрыемствам на «Х Кірмашы каталіцкіх выдаўцоў» у Варшаве, які адбыўся 16-18 красавіка 2004 г., сталі дзве фотавыставы, прывезеныя з Беларусі выдавецтвам PRO CHRISTO. Адна з іх — «Скарбы, якія можна выратаваць» — азнаёміла наведвальнікаў Кірмаша з іконамі са сховішчаў Музея старажытнай беларускай культуры Нацыянальнай Акадэміі Навук Беларусі. Гэтыя іконы, у вельмі пашкоджаным стане, трапілі ў фонды Музея падчас пераследу веры. Супрацоўнікі музея захавалі гэты скарб да нашых часоў, але абразы патрабуюць тэрміновай рэстаўрацыі.

Назва другой выставы — «Вясна Касцёла на Беларусі». «Вясною Касцёла» называе Папа Ян Павел ІІ гады адраджэння хрысціянскай веры на нашай зямлі. Дзякуючы Божаму Провіду мы маем ўжо багаты плён гэтай благаславёнай «вясны». На працягу 13 гадоў на атэістычна-матэрыялістычных руінах няспынна будуюцца новыя святыні і рэстаўруюцца пашкоджаныя, аднаўляюцца знішчаныя. Знакам «вясны» з’яўляюцца таксама і новыя шматлікія пакліканні, (дзве вышэйшыя духоўныя семінарыі ў Гродне i ў Пінску), адноўленыя касцёльныя структуры, каталіцкія выдавецтвы і прэса, і ўсё больш моладзі ў касцёлах...

Фотавыставы, якія былі спецыяльна падрыхтаваныя да Кірмашу, наведалі шматлікія ўдзельнікі і госці. Аўтарамі ўсіх здымкаў з’яўляюцца Алег Глекаў і Мікалай Новікаў (выдавецтва PRO CHRISTO, Мінск).