29 студзеня 2004 г. у Мінску, у Цэнтры імя Ф. Скарыны адбылася прэзентацыя кнігі Уладзіміра Конана “Ксёндз Адам Станкевіч і каталіцкае адраджэнне ў Беларусі”. Арганізатары прэзентацыі - Нацыянальны навукова-асветны цэнтр імя Ф. Скарыны, рэдакцыя часопіса “Наша вера” і выдавецтва “Pro Christo”.

“Ксёндз Адам Станкевіч і каталіцкае адраджэнне ў Беларусі” - гэта чарговае выданне з серыі кніг "Бібліятэка часопіса «Наша вера»" ў выдавецтве “Pro Christo”.

У манаграфіі даследуецца жыццёвы шлях, душпастырская дзейнасць, навуковая, багаслоўская, літаратурна-публіцыстычная, грамадска-палітычная і выдавецкая дзейнасць ксяндза Адама Станкевіча ў кантэксце беларускага каталіцкага адраджэння першай паловы ХХ ст. Раскрываецца багацце хрысціянскіх і нацыянальных ідэяў і канцэпцый адраджэння, абгрунтаваных у манаграфіях, шматлікіх артыкулах і нарысах, перыядычных выданнях. Упершыню аналізуюцца архіўныя матэрыялы, запіскі А. Станкевіча, у якіх асвятляюцца тэарэтычныя, тэалагічныя і палітычныя аспекты адраджэння беларускага Касцёла.

Прэзентацыя пачалася з выступлення аўтара, які коратка пазнаёміў прысутных з асноўнымі этапамі жыцця і дзейнасці кс. А. Станкевіча, адзначыўшы яго асаблівае значэнне для ўсяго беларускага народа і адраджэння яго духоўнай культуры. У. Конан таксама адказаў на пытанні, якія мог задаць кожны з удзельнікаў прэзентацыі.

Ад імя Каталіцкага Касцёла з кароткай прамовай выступіў Апостальскі нунцый у Беларусі арцыбіскуп Іван Юркавіч. Ён асабліва падкрэсліў значэнне, якое можа мець цярпенне, прынятае за бліжніх у імя Хрыста. З прысутных прадстаўнікоў духавенства выступілі таксама ксёндз Уладзіслаў Завальнюк, пробашч парафіі касцёла Святых Сымона і Алены, і ксёндз Аляксандр Тарасевіч, пробашч з Радашковічаў, а ад Праваслаўнай Царквы - святар Юрый Залоска. Вядомы беларускі паэт Ніл Гілевіч сказаў пра вялікі ўклад у духоўнае, культурнае і грамадскае развіццё, які ў розныя часы і ў розных краінах уносілі такія прадстаўнікі духавенства, якім быў ксёндз Адам Станкевіч.

Пазней, ва ўтульнай сяброўскай атмасферы, адбылася неафіцыйная сустрэча за кавай.

Варта адзначыць, што сваю працу, прысвечанаю даследаванню жыцця і дзейнасці кс. А. Станкевіча, аўтар шматлікіх манаграфій і навуковых артыкулаў, прафесар філасофіі У. Конан прадставіў напярэдадні свайго семідзесяцігадовага юбілею.

Аўтар кнігі Уладзімір Конан

 

Галоўны рэдактар часопіса «Наша вера», рэдактар серыі "Бібліятэка часопіса «Наша вера»" Крыстына Лялько

Рэдактар кнігі кс. Аляксандр Тарасевіч

Апостальскі нунцый у Беларусі
Яго Эксцэленцыя арцыбіскуп Іван Юркавіч

 

Дыякан царквы св. Пятра і Паўла Юрась Залоска

Народны паэт Беларусі Ніл Гілевіч

Падчас выступлення

 

Акадэмік Арсен Ліс

Кс. Уладзіслаў Завальнюк

Кніжная выстава